SGtilJS-61-28-09X
- Handrit: XXX Bréf XXXX
- Safn: XXX
- Dagsetning: 28. september, 1861
- Bréfritari: Sigurður Guðmundsson
- Staðsetning höfundar: Reykjavík
- Viðtakandi: Jón Sigurðsson
- Staðsetning viðtakanda: Kaupmannahöfn
- Lykilorð:
- Efni:
- Nöfn tilgreind: XXXXXXX
(Titill 1)
- Texti:
Reykjavík 28 September 1861
Heiðraði vin!
Eptir tilmælum yðar í bréfi til herra Bjarnar Gunnlögssonar tók eg mér ferð á hendur austur á Þíngvöll, sem èg varð að gera til að mynda steininn, því eg átti enga mynd af honum; ennfremur var eg þar í 6 daga með herra Birni, honum til aðstoðar, sem varla mun hafa veitt af, því hann er nú orðinn bæði sljófur og sjóndaufur, sem von er, og varla orðinn til þess konar hluta fær, og því miður skortir hann alveg alla sögulega og vísindalega þekkíngu á staðnum, sem er þó mest áríðandi, ef ekki á að sleppa því hálfa. Annars er ekkert áhlaupaverk að mynda Þíngvöll, og mikið spursmál, hvernig maður á að gera það. Það er auðvitað, að Þíngvöllur verður ekki fullkomlega sýndur, nema með 2 eða 3 kortum: 1. Yfir Þíngvöll og alla Þíngvallasveit austur á Laugarvatnsvöllu og Beitivöllu, suður fyrir vatn og vestur fyrir Bláskógaheiði, og norður á Skjaldbreið, til að sýna Hofmannaflöt og vellina efri og alla forna og nýja vegu, sem liggja að Þíngvelli, því þetta allt heyrir beinlínis til Þíngvelli og vantar á stóra kortið. 2. Þar næst þyrfti að vera annað kort yfir sjálfan Þíngvöll, er sýndi allar seinni alda búðir; en þriðja kortið yfir söguöldina.
Nú er spursmál um, hvað yfirgripsmikið það á að vera; því miður gleymduð þér að ákvarða það. eg hefði viljað, að það hefði verið suður á vatn og nokkuð norður fyrir foss, því það gerir staðinn enn skiljanlegri og fegurri, en til þess þyrfti raunar talsvert lengri tíma og meiri rannsókn, sem er örðugt fyrir gamalmenni.
Þar næst er spursmál, hvað á maður að sýna af mannvirkjum eða búðum? Á maður einungis að sýna þær sem eru greinilegastar og menn vita fyrir víst að eru búðir? Þetta vilja sumir, en aptur á móti álít eg að menn ættu að sýna allt, er menn halda að gæti verið búðir eða búðaleifar, því það getur ekki skaðað, heldur hjálpar það þeim til að finna búðirnar á staðnum, er betur vilja rannsaka það. Eptir tilmælum yðar, þá sagði eg herra Birni nöfn á öllum búðum, er mér voru þá kunnar, og léði honum uppkast af korti með búðanöfnum, er eg hafði þá gert, og hefir hann sumpart notað það, en sumpart ekki, heldur hefir hann sett þær sjálfur eptir Katastasis, er eg léði honum, og vil eg benda yður á að aðgæta vel sumar búðirnar fyrir vestan ána, er hann hefir sett eptir Katastasis, hvort þær eru samhljóða Katastasis. Eg veit ekki betur en allar búðirnar fyrir austan ána séu réttar og eins búðirnar vestur í gjánni frá nýjustu tímum, og eins örnefni, en sum af þeim eru mjög völt, t. d. Flosahlaup og Flosagjá, um það ber mönnum ekki saman; það gerir líka lítið til.
Mér er ekki hægt að gera mínar skoðanir og hugsanir skiljanlegar, nema því að eins, að eg gerði kort eptir mínu eigin höfði, en til þess hefi eg ekki kríngumstæður að svo stöddu, og heldur enga áskorun frá ykkur. Auðvitað er, að nákvæm, skrifleg lýsing ætti að fylgja með, sem lýsti hverju einu sérstöku á Þíngvelli, en okkar tími leyfði það ekki, enda væri það nokkuð vandasamt og snúningasamt verk.
Annars er það ekki einungis Þíngvöllur, sem þörf er að mynda, heldur eru það allir þíngstaðir, og vil eg samt helzt nefna Þíngskálaþing. Þar eiga að sjást um 100—150 búðir, og er þar sýnd Njáls- og Gunnars-búð. Það mundi ekki lítið styrkja Þíngvallarrannsóknina, ef menn hefðu góðar myndir og skýrslur, einkanlega um Þíngskálaþíng, og einnig aðra þíngstaði. — Hér með sendi eg yður mynd af álnarsteininum og fylgir þar með mælikvarði (dönsk alin) og vona eg að menn geti varla misskilið það. Hér með læt eg og fylgja mynd af blótbollanum eða hvað það er. Af öllu þessu leiðir, að eg verð að fá borgun hjá ykkur fyrir hest og mat. Matarreikníngur minn er í sameiníngu við reíkníng Gunnlögsens. Þá verður það, sem mér á að borgast, fyrir hest í 7 daga, 4 mörk um daginn; ef eg á annað borð tek þóknun fyrir mína aðstoð, þá getur það ekki verið minna enn 2 dalir um daginn.
Eg bið kærlega að heilsa konu yðar,
yðar
Sigurður Guðmundsson.
- Gæði handrits:
- Athugasemdir:
- Skönnuð mynd: handrit.is
- Skráð af::
- Dagsetning:
Sjá einnig
Skýringar
<references group="sk" />
Tilvísanir
<references />
