Bréf (SG02-23)
- Handrit: SG 02:23 Bréf frá Eggerti Ó. Briem
- Safn: Þjóðminjasafn Íslands
- Dagsetning: 7. des. 1870
- Bréfritari: Eggert Ó. Briem
- Staðsetning höfundar: Djúpavogur
- Viðtakandi: Sigurður Guðmundsson
- Staðsetning viðtakanda:
- Lykilorð:
- Efni:
- Nöfn tilgreind: P.J.?, Eggert Ólafsson Briem
- Texti:
- ATH búið er að setja kassa utan um ljóðið og skrifa við vinstri hlið: Motta
Bls.1
Djúpavog 7. des. 1870
Húð það og hans gegnsmýgur,
hjartað það tekur á,
að sjá, hvar hann sjálfur flýgur
sveipaður gloría!
Heill sé þér, snillingsinn!
Bréf þitt sept. þ.á. ætti eg að
senda á eitthvert listaverkasafn,
eða helzt að gefa það sem vísi fyrir
íslenzkt listaverkasafn, en eg tími
því ekki. Mér þykir svo vænt um það.
Miði þessi á að eins að vera votti þess.
Þakka þér fyrir málverkið, politíkina og
forngripasafnið.
Þú leggur harðan dóm á höfund
að grein um þjóðhátíðina í Norðanfara.
Eg er höfundur að einni grein um hana þar,
en líklega þó ekki þeirri, er þú átt við. Eg
skrifaði nefnilega móti grein þar um
þjóðhátíðina og tvískiftingu þingsins), eftir
einhvern P.J., en mín grein var svo skikk-
anleg, að enginn hefir líklega tekið eftir
henni.
Um Íslendinga braginn vil eg eigi tala
og þori ekki að tala um hann á pappír,
því eg er hræddur um, að dómurinn félli
ekki öllum í geð, en þér þó líklega
ekki mjög illa.
Bls. 2
Vænt þykir mér að heyra, að forn-
gripasafnið loksins hefir fengið dálítinn
styrk, og nokkuð húsnæði. En dræmt þykir
þér gefast til þess af gripum. Eg er nú einn
daufinginn, er hvorki styrki það af fé
eða gripum. En það er til afsökunar,
að af fénu á eg lítið, og af forngripum
ekkert. Eg hefi heldr ekki orðið var við neina
forngripi hér. Her er allt orðið svo danskt
nálægt kaupstaðnum, og gamalt varla til,
sízt merkilegt. Í Hornafirði kynni það heldr
að vera, þó að líklega sé lítið um það.
En margt er sjálfsagt til hingað og þangað,
og það er ófyrirgefanlegt skeytingarleysi,
að láta það spillast og eyðast í sínum
höndum, öllum gagnslaust, heldr enn að
koma því til safnsins. Nokkurn þátt muna
flutningarnir sem eru svo erfiðir, eiga í því.
að ekki gefst meira. Þú minnist að, að rífa þurfi í blöðin
um slíkt. Eg veit ekki, hvort eg verð
upplagðr til að skamma náungann fyrir
það, og þó eg yrði það, yrði það afl-
laust og gagnslaust. Eg er ekki sá
gyllinraftr í skömmunum sem þú.
Góða nótt í þetta sinn
Eggert Ólafsson Briem.
- Skráð af: Heiða Björk Árnadóttir. Yfirfarið: Elsa Ósk Alfreðsdóttir
- Dagsetning: 07.2011
Sjá einnig
Skýringar
<references group="sk" />
Tilvísanir
<references />
